தர்மபுரி மாவட்டம் பென்னாகரம் பகுதி இயற்கை வளம் மற்றும் சுற்றுலாத்தலங்களால் தமிழகம் முழுவதும் பிரசித்தி பெற்ற பகுதியாக விளங்கி வருகிறது குறிப்பாக ஒகேனக்கல், காவிரி கரைப்பகுதிகள் மற்றும் சுற்றியுள்ள மலைப்பகுதிகளுக்கு தினந்தோறும் ஆயிரக்கணக்கான சுற்றுலாப் பயணிகள் வந்து செல்கின்றனர்
இந்த மக்கள் நடமாட்டத்தை பயன்படுத்தி சில சமூக விரோத கும்பல்கள் பென்னாகரம் பகுதியில் கள்ள லாட்டரி விற்பனை மற்றும் சட்டவிரோத சந்து கடை வியாபாரங்களை வெளிப்படையாக நடத்தி வருவதாக பொதுமக்கள் குற்றம்சாட்டுகின்றனர் பேருந்து நிலையம் முதல் கிராமப்புறங்கள் வரை சட்டவிரோத வியாபாரம்
பென்னாகரம் பேருந்து நிலையம், சந்தை பகுதி, சுற்றுலா மையங்கள் மற்றும் கிராமப்புற சாலைகள் அருகே சட்டவிரோத லாட்டரி விற்பனை நடைபெறுவதாக கூறப்படுகிறது.
ஒரே நாளில் லட்சாதிபதி ஆகலாம் அதிர்ஷ்ட சீட்டு என்ற பெயரில் ஏழை மக்களும், தினக்கூலி தொழிலாளர்களும் ஏமாற்றப்படுவதாக சமூக ஆர்வலர்கள் தெரிவிக்கின்றனர்
குறிப்பாக வேலை இன்றி சுற்றித்திரியும் இளைஞர்கள் மற்றும் பொருளாதார நெருக்கடியில் இருக்கும் குடும்பத்தினர் லாட்டரி ஆசையில் பணத்தை இழந்து வருவதாகவும், இதனால் குடும்பங்களில் சண்டை, கடன் சுமை மற்றும் மனஅழுத்தம் அதிகரித்து வருவதாகவும் கூறப்படுகிறது.
அதேபோல், சில இடங்களில் அனுமதி இல்லாமல் செயல்படும் சந்து கடைகளில் சட்டவிரோதமாக மது விற்பனை நடைபெறுவதாகவும், தரமற்ற போதைப் பொருட்கள் கூட மறைமுகமாக விற்கப்படுவதாகவும் குற்றச்சாட்டு எழுந்துள்ளது.
மது போதையில் தகராறு – பெண்கள் அச்சம்
சந்து கடைகளின் அதிகரிப்பால் பென்னாகரம் பகுதியில் இரவு நேரங்களில் சமூக அமைதி பாதிக்கப்படுவதாக பொதுமக்கள் கூறுகின்றனர்
மது அருந்திய சிலர் சாலையில் செல்லும் பொதுமக்கள், பெண்கள் மற்றும் வாகன ஓட்டிகளிடம் தகராறில் ஈடுபடுவது வழக்கமாகி விட்டதாக குற்றச்சாட்டு உள்ளது. குறிப்பாக பள்ளி, கல்லூரி மாணவிகள் மற்றும் வேலைக்குச் செல்லும் பெண்கள் பாதுகாப்பற்ற சூழ்நிலையில் இருப்பதாகவும் மக்கள் தெரிவிக்கின்றனர்
இது குறித்து பலமுறை புகார் கொடுத்தும் அதிகாரிகள் உரிய நடவடிக்கை எடுக்கவில்லை என்ற குற்றச்சாட்டும் எழுந்துள்ளது.
பெண்கள் நேரடியாக களமிறங்கிய சம்பவம்
சமீபத்தில் பென்னாகரம் பகுதியில் செயல்பட்டு வந்த சில சந்து கடைகளை பெண்கள் நேரடியாக சென்று அடித்து உடைத்த சம்பவம் பெரும் பரபரப்பை ஏற்படுத்தியது
எங்கள் குடும்பங்களை இந்த சந்து கடைகள் சீரழிக்கின்றன குடும்ப வருமானம் முழுவதும் மதுவில் செல்கிறது என்று பெண்கள் கண்ணீர் மல்க கூறிய வீடியோக்கள் சமூக வலைதளங்களில் வைரலாக பரவின.
இந்த சம்பவம் தமிழகம் முழுவதும் பேசுபொருளாக மாறிய நிலையில் கூட சம்பந்தப்பட்ட அதிகாரிகள் முழுமையான நடவடிக்கை எடுக்காதது ஏன் என்ற கேள்வி எழுந்துள்ளது
மாதாமாதம் மாமூல் வாங்கப்படுகிறதா – மக்கள் கேள்வி
பென்னாகரம் பகுதியில் கள்ள லாட்டரி மற்றும் சந்து கடைகள் பல ஆண்டுகளாக செயல்பட்டு வருவதாக கூறப்படும் நிலையில், காவல்துறை மற்றும் மதுவிலக்கு அமல்பிரிவு அதிகாரிகள் கடுமையான நடவடிக்கை எடுக்காதது குறித்து பொதுமக்கள் சந்தேகம் வெளியிட்டுள்ளனர்.
சில சமூக ஆர்வலர்கள், மாதாந்திர லஞ்சம் மற்றும் மாமூல் காரணமாகவே சட்டவிரோத செயல்களுக்கு எதிராக அதிகாரிகள் கண்மூடித்தனமாக இருக்கிறார்கள் என்று குற்றம்சாட்டுகின்றனர் மேலும், பொதுமக்கள் அளிக்கும் புகார்கள் சில நேரங்களில் பதிவு செய்யப்படுவதில்லை என்றும், புகார் கொடுத்தவர்களே பின்னர் அச்சுறுத்தலுக்கு உள்ளாகிறார்கள் என்றும் குற்றச்சாட்டு எழுந்துள்ளது.
செய்தியாளர்களுக்கு மிரட்டல் – போலி நிருபர்கள் மீது குற்றச்சாட்டு
இந்த சட்டவிரோத வியாபாரங்கள் குறித்து நேர்மையான செய்தியாளர்கள் செய்தி சேகரிக்கச் சென்றபோது, சில போலி நிருபர்கள் மற்றும் சமூக விரோத கும்பல்கள் அவர்களை மிரட்டியதாக தகவல் வெளியாகியுள்ளது.
“செய்தி வெளியிட்டால் பார்த்துக்கொள்கிறோம்”, இங்கே யாரும் படம் எடுக்கக்கூடாது என்று மிரட்டல்கள் விடுக்கப்படுவதாக கூறப்படுகிறது
சிலர் கட்டப்பஞ்சாயத்து செய்து பிரச்சினைகளை மறைக்க முயற்சிப்பதாகவும், சட்டவிரோத வியாபாரிகளுக்கு ஆதரவாக செயல்படுவதாகவும் குற்றச்சாட்டு எழுந்துள்ளது
செய்தி வெளியானால் தங்களது வருமானம் பாதிக்கப்படும் என்பதாலேயே சிலர் இவ்வாறு செயல்படுகின்றனர் என்று பொதுமக்கள் தெரிவிக்கின்றனர்.
சட்டப்படி என்ன நடவடிக்கை
கள்ள லாட்டரி கடுமையான குற்றம்
இந்தியாவில் அனுமதி இல்லாமல் லாட்டரி சீட்டுகள் விற்பனை செய்வது சட்டவிரோதம்
Lotteries (Regulation) Act, 1998 படி:
கள்ள லாட்டரி விற்பனை செய்தால் கைது
அபராதம் மற்றும் சிறை தண்டனை
லாட்டரி சீட்டுகள், பணம், ஆவணங்கள் பறிமுதல்
சம்பந்தப்பட்ட இடங்களை மூடும் அதிகாரம் காவல்துறைக்கு உண்டு
தமிழ்நாடு மதுவிலக்கு சட்டம் – 1937
அனுமதி இல்லாமல் மது விற்பனை செய்வது குற்றமாகும்.
சட்டத்தின் கீழ்
சட்டவிரோத மதுபான விற்பனைக்கு சிறை தண்டனை
பல ஆயிரம் ரூபாய் அபராதம்
மீண்டும் குற்றம் செய்தால் கடுமையான தண்டனை
கடை மூடல் மற்றும் பொருட்கள் பறிமுதல்
செய்தியாளர்களை மிரட்டினால்
செய்தியாளர்களின் பணியை தடுக்குதல், தாக்குதல் அல்லது மிரட்டுதல் இந்திய தண்டனைச் சட்டத்தின் கீழ் குற்றமாகும்.
தொடர்புடைய பிரிவுகள் மிரட்டல்
தாக்குதல் முயற்சி
பொது அமைதிக்கு இடையூறு
சட்டவிரோத கூட்டம்
போன்ற பிரிவுகளின் கீழ் வழக்குப்பதிவு செய்ய முடியும்
மாவட்ட காவல் கண்காணிப்பாளருக்கு பொதுமக்கள் கோரிக்கை
பென்னாகரம் பகுதியில் நடைபெற்று வரும் கள்ள லாட்டரி மற்றும் சந்து கடை வியாபாரங்களை உடனடியாக தடுத்து, சம்பந்தப்பட்டவர்களை கைது செய்து கடுமையான நடவடிக்கை எடுக்க வேண்டும் என்று பொதுமக்கள் மற்றும் சமூக ஆர்வலர்கள் தர்மபுரி மாவட்ட காவல் கண்காணிப்பாளர் எஸ்.எஸ். மகேஸ்வரன் அவர்களிடம் கோரிக்கை விடுத்துள்ளனர்.
மேலும், இந்த சட்டவிரோத செயல்களுக்கு துணைபோகும் அதிகாரிகள், போலி நிருபர்கள் மற்றும் சமூக விரோத கும்பல்களை உளவுத்துறை கண்காணித்து நடவடிக்கை எடுக்க வேண்டும் என்றும் வலியுறுத்தியுள்ளனர் பென்னாகரம் பகுதி மக்கள் அமைதியாக வாழ வேண்டுமெனில் சட்டவிரோத கள்ள லாட்டரி மற்றும் சந்து கடை வியாபாரங்களுக்கு முற்றுப்புள்ளி வைக்க வேண்டும்” என்பதே அப்பகுதி மக்களின் ஒருமித்த கோரிக்கையாக உள்ளது.
ஆசிரியர்.
D. ராஜீவ் காந்தி