தருமபுரி மாவட்டம் அரூர் அருகே உள்ள பாளையம் பகுதியில் அமைந்துள்ள பழமை வாய்ந்த அண்ணா மறுமலர்ச்சி திட்ட கட்டிடம் மிகவும் சேதமடைந்த நிலையில் காணப்படுவதால், அதனை இடித்துவிட்டு புதிய கட்டிடம் கட்டித் தர வேண்டும் என அப்பகுதி பொதுமக்கள் மற்றும் சமூக ஆர்வலர்கள் அரசுக்கு கோரிக்கை விடுத்துள்ளனர்.பல ஆண்டுகளுக்கு முன்பு கட்டப்பட்ட இந்த அண்ணா மறுமலர்ச்சி கட்டிடம் தற்போது சுவர்கள் விரிசல் ஏற்பட்டு, மேற்கூரை சேதமடைந்து ஆபத்தான நிலையில் இருப்பதாக கூறப்படுகிறது. மழைக்காலங்களில் கட்டிடத்தின் பல பகுதிகளில் தண்ணீர் ஒழுகுவதுடன், எந்த நேரத்திலும் கட்டிடம் இடிந்து விழும் அபாயம் இருப்பதாக மக்கள் அச்சம் தெரிவித்து வருகின்றனர்.இந்த கட்டிடம் முன்பு பொதுமக்கள் கூட்டங்கள், சமூக நிகழ்ச்சிகள் மற்றும் பல்வேறு அரசு சார்ந்த நிகழ்வுகளுக்காக பயன்படுத்தப்பட்டதாக கூறப்படுகிறது. ஆனால் தற்போது கட்டிடத்தின் மோசமான நிலை காரணமாக மக்கள் பயன்படுத்த முடியாத சூழ்நிலை ஏற்பட்டுள்ளதாக தெரிவிக்கப்படுகிறது.மேலும், அப்பகுதியில் மாணவர்களின் கல்வி தேவையை கருத்தில் கொண்டு புதிய பாடசாலை அமைக்கவும் பொதுமக்கள் வலியுறுத்தியுள்ளனர். தற்போது மாணவர்கள் அருகிலுள்ள கிராமங்களுக்கு நீண்ட தூரம் பயணம் செய்து பள்ளிக்குச் செல்ல வேண்டிய நிலை இருப்பதாகவும், இதனால் மாணவர்கள் சிரமத்திற்கு உள்ளாகி வருவதாகவும் பெற்றோர்கள் வேதனை தெரிவித்துள்ளனர்.குறிப்பாக, கிராமப்புற மாணவர்களின் கல்வி முன்னேற்றத்திற்காக புதிய பள்ளி கட்டிடம், போதிய வகுப்பறைகள், குடிநீர் வசதி, கழிப்பறை வசதி மற்றும் விளையாட்டு மைதானம் உள்ளிட்ட அடிப்படை வசதிகளுடன் கல்வி நிலையம் அமைக்க வேண்டும் என சமூக ஆர்வலர்கள் கோரிக்கை விடுத்துள்ளனர்.இதுகுறித்து பலமுறை சம்பந்தப்பட்ட அதிகாரிகளிடம் மனுக்கள் அளிக்கப்பட்டும் இதுவரை எந்தவித நடவடிக்கையும் எடுக்கப்படவில்லை என பொதுமக்கள் குற்றம்சாட்டுகின்றனர். எனவே, தருமபுரி மாவட்ட நிர்வாகம் மற்றும் தமிழக அரசு உடனடியாக ஆய்வு செய்து, பழுதடைந்த கட்டிடத்தை அகற்றி புதிய அண்ணா மறுமலர்ச்சி கட்டிடத்தையும், புதிய பாடசாலையையும் அமைக்க தேவையான நடவடிக்கைகளை விரைந்து மேற்கொள்ள வேண்டும் என அப்பகுதி மக்கள் வலியுறுத்தியுள்ளனர்.
தலைமை செய்தியாளர்.
பசுபதி